سفارت افغانستان در تاجکیستان اعلام کرده که دولت این کشور ۵۰ بورسیه تحصیلی را به دانشجویان افغانستان اهدا کرده است.
محمد ظاهر اغبر، سفیر افغانستان مقیم دوشنبه تاجیکستان روز شنبه، ۲۶ جوزا، در ایکس از اهدای این تعداد بورسیه خبر داده است.
آقای اغبر گفته که فصل جدیدی از آزمون‌ها را برای جذب دانشجویان به بورسیه‌های اهداشده از سوی تاجیکستان با دولت این کشور آغاز کرده‌اند.
سفیر افغانستان در تاجیکستان نوشته است: «در شرایطی که دروازه‌های علم و تعلیم به روی دختران ما هنوز بسته است و کیفیت آموزشی در پایین‌ترین سطح خود قرار دارد، این بورسیه‌ها امیدی است برای تقدیم نسل جدیدی از متخصصین برای خدمت به اجتماع.»
براساس اطلاعاتی که محمد ظاهر اغبر نشر کرده، دانشجویان واجد شرایط از طریق برگزاری آزمون به بورسیه‌های اعلام‌شده، حذب خواهند شد.
انتظار می‌رود که به دختران در اهدای بورسیه‌های تحصیلی تاجیکستان اولویت داده شود.
آقای اغبر بخاطر اهدای بورسیه‌های یادشده از دولت تاجیکستان سپاسگزاری کرده و از شهروندان کشور مقیم تاجیکستان خواسته که برای راه‌یابی به فرصت‌های تحصیلی اهداشده تاجیکستان ثبت کنند.
سفار افغانستان در تاجیکستان پس از تسلط طالبان بر کشور تاکنون به‌گونه مستقلانه و براساس خط مشی حکومت پیشین فعالیت دارد.
مسوولان این سفارت تاکنون حاضر نشده‌اند که از دستورات وزارت خارجه طالبان پیروی کنند.
