در ادامه رقابت‌های فوتبال زیر هفده ساله‌های فوتبال کشورهای مرکز آسیا (کافا) دیدار نهایی این رقابت‌ها میان تیم‌های افغانستان و اوزبیکستان برگزار می‌شود.
فدراسیون ملی فوتبال افغانستان زیر اداره طالبان روز شنبه، ۳ سنبله، از دیدار تیم‌های فوتبال افغانستان و اوزبیکستان خبر داده است.
براساس اعلام این فدراسیون، دیدار تیم‌های یادشده ساعت ۷:۳۰ دقیقه شام روز شنبه، به وقت افغانستان برگزار خواهد شد.
این دیدار جالب و هیجانی در شهر دوشنبه، پایتخت تاجیکستان برگزار می‌شود.
فدراسیون ملی فوتبال کشور زیر اداره طالبان این رویداد را «روز تاریخی» برای افغانستان عنوان کرده است.
این دیدار انتظار می‌رود که از سوی صفحه یوتیوب کافا به‌گونه زنده نشر شود.
دیدار نهایی رقابت‌های فوتبال زیر هفده‌ساله‌های کشور میان تیم‌های ملی فوتبال افغانستان و اوزبیکستان در حالی برگزار می‌شود که پیش از این تیم ملی فوتبال افغانستان در این رقابت‌ها درخشش قابل قناعت از خود نشان داده است.
تیم ملی فوتبال افغانستان پیش از این تیم‌های تاجکستان و قرغیزستان را از پیش‌رو برداشته است.
