در ادامه ابراز نگرانی کشورها و سازمان‌های امنیتی منطقه‌ای، نسبت به گسترش فعالیت‌های «تروریستی» در افغانستان زیر سلطه طالبان، کمیته امنیت ملی قرغیزستان به تازه‌گی گفته که فعالیت «گروه‌های تروریستی» در شمال این کشور، افزایش یافته است.
تاس، خبرگزاری دولتی روسیه روز جمعه، ۴ جوزا، در گزارشی به نقل از کامچی‌بیک تاشف، رییس کمیته امنیت ملی قرغیزستان، این موضوع را گزارش داده است.
آقای تاشف در نشست سران کشورهای مشترک‌المنافع در بیشکک، پایتخت قرغیزستان، گسترش فعالیت گروه‌های تروریستی در افغانستان را تهدیدی غیرقابل انکار بر امنیت مرزهای جنوبی کشورهای یادشده دانسته است.
رییس کمیته امنیت ملی قرغیزستان تهدیدات ناشی از فعالیت گروه‌های تروریستی در ولایت‌های شمال افغانستان را نیازمند توجه‌ویژه کشورهای مشترک‌المنافع، دانسته است.
کشورهای مشترک‌المنافع شامل مولداوی، قزاقستان، قرغیزستان، روسیه، تاجیکستان، بلاروس، اوزبیکستان، ارمنستان و آذربایجان است.
این بار نخست نیست که کشورهای دور و پیش افغانستان از فعالیت گروه‌های «تروریستی» در افغانستان زیر تسلط طالبان، ابراز نگرانی می‌کنند.
پیش از این سازمان پیمان امنیت جمعی که کشورهای آسیای میانه در آن عضویت دارند، از فعالیت گروه‌های «تروریستی» در داخل خاک افغانستان و در موجودیت طالبان ابراز نگرانی کرده‌اند.
پاکستان در ۱۰ روز گذشته برای دومین‌بار از فعالیت گروه‌های «تروریستی» در داخل خاک افغانستان ابراز نگرانی کرده است.
