هم‌زمان با هفتادنهمین سالگشت پیروزی مسکو در جنگ جهانی دوم، امام‌علی رحمان رییس جمهوری تاجیکستان در سفر به مسکو با ولادیمیر پوتین، رییس جمهوری روسیه، دیدار کرده است.
کرملین پنج‌شنبه‌شب، ۹ می، با نشر خبرنامه‌ای از دیدار دو رهبر، خبر داده است.
در خبرنامه به نقل از امام‌علی رحمان، رییس جمهوری تاجیکستان آمده که دوشنبه و مسکو به‌گونه مشترک با تهدیدات جهانی مبارزه خواهند کرد.
رییس جمهوری تاجیکستان در دیدار با همتای روس‌اش حمله مرگ‌بار تالار کروکاس در حومه‌ای مسکو را «فاجعه» خوانده است.
امام‌علی رحمان در عین‌زمان تاکید کرده که تروریزم نه ملیت دارد، نه دین و نه وطن.
فرد شماره یک دولت تاجیکستان بر مبارزه مشترک با تروریزم و افراط‌گرایی، تاکید کرده است.
در همین حال، در خبرنامه به نقل از ولادیمیر پوتین، رییس جمهوری روسیه آمده است که: «سرویس‌های ویژه ما فعالانه برای رفع تهدیدات کار می‌کنند، زیرا تروریسم تهدیدی برای همه کشورها است از جمله برای روسیه و تاجیکستان.»
دیدار رهبران تاجیکستان و روسیه در حالی صورت گرفته که دوشنبه نگران امنیت مرز‌هایش با افغانستان است.
این نگرانی پس از تسلط طالبان بر افغانستان و افزایش تهدیدات گروه‌های تروریستی از این کشور زیر اداره طالبان، شکل گرفته است.
سازمان پیمان امنیت جمعی اخیراً رزمایش‌های مشترک نظامی را به هدف تامین امنیت مرزهای تاجیکستان با افغانستان، انجام داده است.
