شهباز شریف، نخست‌وزیر پاکستان در یک سفر دو روزه به دوشنبه، پایتخت تاجیکستان سفر کرده است.
آقای شریف روز سه‌شنبه، ۲ جولای، با امام‌علی رحمان، رییس جمهوری تاجیکستان، دیدار کرده است.
هدف از سفر نخست‌وزیر پاکستان به تاجیکستان گفت‌وگو در مورد روابط دوجانبه اسلام‌آباد و دوشنبه و اتصال منطقه‌ای گفته شده است.
آقای شریف در ایکس نوشته که اسلام‌آباد در تلاش است تا روابط خود با دوشنبه را به سطح بی‌پیشینه‌ای گسترش دهد.
نخست‌وزیر پاکستان در سفرش به دوشنبه با قاهر رسول‌زاده، همتای تاجیکستانی‌اش نیز دیدار کرده است.
گفته شده که شهباز شریف و هیات همراهش پس از دیدار از تاجیکستان به هدف اشتراک در نشست سران همکاری شانگهای به قزاقستان خواهد رفت.
هرچند پاکستان و تاجیکستان پس از تسلط طالبان بر افغانستان نسبت به گسترش تهدیدات تروریستی از افغانستان ابراز نگرانی پیهم کرده‌اند؛ اما در اعلامیه‌های دو کشور در مورد مسایل امنیتی مورد بحث میان رهبران شریف با مقام‌های تاجیکستانی چیزی گفته نشده است.
