نشست سازمان همکاریهای شانگهای با حضور وزیران امور خارجه کشورهای عضو این سازمان برگزار شده است.
این نشست دوشنبه‌شب، ۲۰ می، به وقت محلی با میزبانی قزاقستان در شهر آستانه پایتخت این کشور، برگزار شده است.
در نشست وزیران خارجه کشورهای عضو سازمان همکاری شانگهای در مورد تقویت همکاریهای چندجانبه اقتصادی، سیاسی، فرهنگی و مبارزه با تروریزم، گفت‌وگو می‌شود.
اولویت اشتراک کننده‌گان نشست کنونی شانگهای آماده شدن برای نشست سران کشورهای عضو این سازمان است.
قرار است نشست سران کشورهای عضو سازمان همکاری شانگهای در ماه جولای سال‌جاری میلادی برگزار شود.
انتظار می‌رود که در نشست سران شانگهای، شی جین پینگ و ولادیمیر پوتین، رییسان جمهور چین و روسیه اشتراک کنند.
سازمان همکاری شانگهای از ابتکارات چین با کشورهای آسیای میانه و اطراف آن است.
بیجینگ با طرح و ایجاد این سازمان و تقویت بریکس، در صدد رویارویی و جلوگیری از گسترش نفوذ گروه۷ و ناتو، است.
در سازمان شانگهای کشورهای چین، روسیه، ایران، پاکستان، هند، تاجیکستان، اوزبیکستان، قزاقستان و قرغیزستان حضور دارند.
