منابعی به تلویزیون بینا، می‌گویند که امیر محمد اسماعیل، رهبر جهادی و والی پیشین ولایت هرات برای شرکت در نشست امنیتی هرات وارد دوشنبه، پایتخت تاجیکستان شده است.
به گفته‌ی منابع، آقای اسماعیل خان ساعتی پیش به شهر دوشنبه‌ی تاجیکستان رسیده و قرار است با سایر سیاسیون افغانستان در این نشست شرکت کند.
منابع، می‌گویند که اسماعیل خان در دور یازدهم نشست امنیتی هرات سخنرانی خواهد کرد؛ این نخستین سخنرانی او پس از سقوط جمهوریت به دست طالبان است.
گفته می‌شود که بسم‌الله محمدی، وزیر پیشین دفاع و محمدظاهر اغبر، سفیر افغانستان در تاجیکستان از آقای اسماعیل خان در شهر دوشنبه استقبال کرده‌اند.
قرار است که دور یازدهم نشست امنیتی هرات فردا دوشنبه، ۶ قوس در شهر دوشنبه‌ی تاجیکستان برگزار شود.
در همین حال داوود مرادیان، رییس موسسه‌ی مطالعات راهبردی افغانستان، گفته است که این نشست با حضور همه‌ی نمایندگان گروه‌های سیاسی افغانستان برگزار می‌شود.
هم‌چنان گفته شده که برای نمایندگان طالبان نیز، دعوت‌نامه فرستاده شده؛ اما تا هنوز مشخص نیست که آیا نمایندگان این گروه خواهند کرد یا خیر.
مسوولان برگزاری نشست امنیتی هرات، می‌گویند که در این نشست قرار است در مورد موضوعات مختلف از جمله گفت‌وگوی ملی برای توسعه دموکراسی، برابری جنسیتی، کمک‌های بشردوستانه به مردم افغانستان، بازگشت به اسلام متمدن و مردمی و همبستگی با همسایگان بحث و تبادل نظر شود.
این دومین سالی است که نشست امنیتی هرات در شهر دوشنبه‌ی تاجیکستان برگزار می‌شود.
