ظاهر اغبر، سفیر معرفی‌شده‌ی حکومت پیشین برای سفارت افغانستان در شهر دوشنبه تاجیکستان، مکتوب طالبان برای تقرری فردی به عنوان سکرتر اول این سفارت را در حضور رسانه‌ها پاره کرد.
آقای اغبر روز سه‌شنبه، ۱۶ عقرب در یک نشست خبری، گفت که نمایندگی سیاسی مردم افغانستان، مربوط به یک قوم، تنظیم و سازمان سیاسی خاص نیست؛ بلکه یک «امانت» است. «ما و تیم کاری ما مسوولیت حفاظت آن را به دوش داریم. به مردم خود اطمینان می‌دهیم که تا آمدن یک حکومت مشروع در افغانستان از این امانت حفاظت می‌کنیم.»
او هم‌چنان از سیاست حکومت تاجیکستان در قبال طالبان و حمایت شان از مردم افغانستان و هم‌چنان سازمان ملل به خاطر عدم به رسمیت‌شناختن گروه طالبان ابراز قدردانی کرد.
این در حالی است که در روزها اخیر مکتوبی در شبکه‌های اجتماعی دست‌به‌دست می‌شود که نشان می‌دهد وزارت خارجه‌ی طالبان فردی به نام فیض‌الله را به عنوان سکرتر اول سفارت افغانستان در تاجیکستان تعیین کرده است.
این مکتوب امضای امیرخان متقی، سرپرست وزارت خارجه‌ی طالبان را دارد و در آن، از سفارت افغانستان در تاجیکستان خواسته شده که از اجراعات خود به وزارت خارجه‌ی این گروه گزارش دهد.
تاجیکستان یکی از کشورهایی است که مسوولان سفارت پیشین افغانستان هنوز هم در آنجا فعال استند و کارهای این سفارت را به پیش می‌برند.
