امام‌علی رحمان، رییس جمهوری تاجیکستان با محمد عاصم مالک، رییس سازمان استخبارات نظامی پاکستان (آی‌اس‌آی) دیدار و گفت‌وگو کرده است.
براساس اعلام ویبسایت ریاست جمهوری تاجیکستان، این دیدار روز دوشنبه، ۳۰ دسمبر، در دوشنبه، پایتخت این کشور انجام شده است.
دو طرف در این دیدار در مورد وضعیت کنونی و چشم‌انداز آینده روابط سیاسی میان تاجیکستان و پاکستان گفت‌وگو کرده‌اند.
برپایه اطلاعات منتشر شده، دو طرف روی همکاری و روابط دوجانبه میان اسلام‌آباد و دوشنبه به‌ویژه در زمینه‌های صلح، ثبات و امنیت منطقه‌ای، رای‌زنی کرده‌اند.
در بیانیه منتشرشده از این دیدار آمده است: «هر دو طرف بر لزوم تقویت همکاری در مبارزه با تروریسم، افراط گرایی، رادیکالیسم، قاچاق مواد مخدر، جنایات فراملی و سایر موضوعات مورد علاقه دوجانبه تاکید کردند.»
امام‌علی رحمان، رییس جمهوری تاجیکستان بر مشارکت دوشنبه و اسلام‌آباد در موضوعات امنیتی و تماس‌های منظم دوجانبه تاکید کرده است.
این دیدار پس از آخرین درگیری میان جنگ‌جویان طالبان و نظامیان پاکستانی صورت گرفته است.
تاجیکستان و پاکستان دو همسایه افغانستان هستند.
اسلام‌آباد پس از برگشت طالبان به قدرت در افغانستان همواره شاکی از فعالیت‌های خراب‌کارانه گروه‌های مسلح محالف‌اش زیر چتر گروه طالبان بوده و دوشنبه نیز میزبانی دفتر فعالیت مخالفان نظامی گروه طالبان در بیش از سه سال گذشته را داشته است.
