امام علی رحمان، رییس جمهوری تاجیکستان با ولادیمیر پوتین، رییس جمهوری روسیه دیدار و گفت‌وگو کرد.
آسیا پلس، از رسانه‌های تاجیکستان به نقل از بیانیه‌های رسانهای دفاتر هردو رییس جمهوری گزارش داده که این دیدار ناوقت روز سه‌شنبه، ۲۴ دسمبر، در روسیه صورت گرفته است.
براساس گزارش، رهبران روسیه و تاجیکستان در این دیدار در مورد همکاری‌ها در بخش «تضمین امنیت و ثبات از جمله امنیت اطلاعات» که بخشی از گفت‌وگوی آنان را تشکیل می‌داد صحبت کرده‌اند.
برپایه اطلاعات بیانیه رسانهای دفتر رییس جمهوری روسیه، پوتین دوشنبه را شریک راهبردی مسکو دانسته که در صدر کشورهای دارای روابط سیاسی و اقتصادی با این کشور قرار دارد.
هرچند پیش از این دیدار موضوعات از جمله چالش‌های امنیتی در مرز میان تاجیکستان و افغانستان از موضوعات مورد بحث میان رحمان و پوتین گفته شده بود؛ اما در بیانیه‌های مطبوعاتی دفتر دو رییس جمهور به آن اشاره‌ای نشده است.
تاجیکستان پس از برگشت طالبان به قدرت در افغانستان نسبت به بروز تهدیدات امنیتی از این کشور بارها ابراز نگرانی کرده است.
این نگرانی‌ها در حالی ابراز شده که شریک راهبردی دوشنبه (مسکو) در هفته‌های اخیر راه را برای بیرون کردن نام طالبان از لیست گروه‌های تروریستی، باز کرده است.
Russian president's press service
