د «انقلاب زنان افغانستان» تر نامه لاندې معترضې میرمنې یو ځل بیا د انجونو د ښونځیو او پوهنتونونو د خلاصېدو غوښتونکې شوې
دغه میرمنو د یکشنبې په ورځ د قوس میاشتې په ۵ نېټه په خپل اعتراض کې ټینګار کړی، چې د طالبانو له لورې د انجونو پر وړاندې د ښوونځیو او پوهنتونونو د دروازو تړل یو له تاوتریخجنو پرېکړو څخه ده.
د دوي په وینا د طالبانو په حاکمیت کې افغان میرمنې له ټولو انساني حقونو څخه بې برخې دي.
دا معترضې میرمنې وایي، چې میرمنې او حتآ سړي د بېکارۍ او فقر له وجې ځان وژنې ته مجبور شوي دي.
دا پداسې حال کې ده، چې د امریکا او نړۍ له لورې په مرسته کېدونکو پیسو طالب مشران ځانته نوي کورونه جوړوي او د دویم او دریم واده په لټه کې دي.
د معترضو میرمنو په وینا کې راغلي: « د ۲۰۲۱ کال د اګست میاشتې د ۱۵ نېټې د جمهوریت له سقوط وروسته افغان میرمنې د زده کړو، کار، شخصي امنیت، انساني کرامت، د بیان له ازادۍ، د ټاکلو له حق او په ټوله کې له انساني حقونو بې برخې شوي دي.»
دوي همدارنګه ټینګار کوي، چې په افغانستان کې د انجونو پر زده کړو بندیز د هیڅ ډول توجیه وړ ندی او اوږود مهالي منفي تاثیرات به ولري.
د معترضو میرمنو په خبره، افغان میرمنې په نړۍ کې د تاوتریخوالي یو له لویو قربانیانو دي.
دا پداسې حال کې ده، چې طالبان د واک ترلاسه کولو وروسته د میرمنو پر فعالیتونو د محدودیتونو په لګولو بوخت دي.
افغان میرمنې د دې ډلې تر واک لاندې په کور ناستې دي.
له شپږم ټولګي پورته انجوني ښوونځیو ته د تګ اجازه نلري او همدارنګه پوهنتونونه د انجونو پر وړاندې تړلي دي.
په ورته وخت کې دې معترضو میرمنو ویلي، چې پریسا ازاد، منیژه صدیقي، ندا پرواني د میړه او څلور کلن زوي سره او همدارنګه د د خپل زوی سره ژولیا پارسي د طالبانو له خوا زنداني او شکنجه شوي دي.
دوي لا هم د طالبانو په بند کې دي او تراوسه یې په اړه هیڅ معلومات نشته
