امام‌علی رحمان، رییس جمهوری تاجیکستان خواستار تشکیل حکومت «واقعا فراگیری» در افغانستان شده است.
آقای رحمان این مطلب را روز چهارشنبه، ۱۳ سرطان، در یک نشست مشترک خبری با شهباز شریف، نخست‌وزیر پاکستان در شهر دوشنبه، ابراز کرده است.
رییس جمهوری تاجیکستان گفته که ثبات کامل و برقراری نظم اقتصادی و اجتماعی در افغانستان برای تامین امنیت و رشد همکاری‌های منطقه‌ای ارزش ویژ‌ه‌ای دارد.
امام‌علی رحمان تاکید کرده که: «تاجیکستان طرفدار تامین صلح‌وثبات پایدار در افغانستان بوده و در این راستا، ایجاد دولت واقعاً همه‌شمول را عامل کلیدی می‌شمارد.»
او هم‌چنان افزوده که تروریزم افراط‌گرایی، مواد مخدر و دیگر تهدیدات فرامرزی که امنیت افغانستان، تاجیکستان و تمام منطقه را با خطر جدی روبه‌رو می‌سازد، زیر بررسی‌های دوشنبه، قرار داشته است.
تاجیکستان پس از تسلط طالبان بر افغانستان بارها نگرانی‌اش را نسبت به افزایش تهدیدات «گروه‌های تروریستی» از این کشور ابراز کرده است.
دوشنبه، اخیراً افزون بر راه‌اندازی مانورهای مشترک نظامی با روسیه در امتداد مرزهایش با افغانستان، به تقویت امنیت مرزها و قیودات رفت‌وآمد در این بخش‌ها دست زده است.
