مقام‌های وزارت امور داخله تاجیکستان تایید کرده‌اند که شماری از افراد مسلح از افغانستان با عبور از مرز داخل خاک تاجیکستان شده و بر شهروندان تاجیکی و چینی حمله کرده‌اند.
این حمله یک‌شنبه‌شب، ۲۷ عقرب، در روستای “شمس‌الدین شاهین” رخ داده است.
شمس‌الدین شاهین، از بخش‌های مرزی میان افغانستان و تاجیکستان واقع در ولایت ختلان تاجیکستان است.
یک منبع معتبر از وزارت امور داخله تاجیکستان که نخواسته نام‌اش افشا شود، گفته که این حمله بر کارگران تاجیکی و چینی در یک معدن طلا صورت گرفته است.
منبع گفته که در نتیجه این حمله یک انجنیر از شهروندان چین کشته و چهار تن دیگر از شهروندان چینی و تاجیکی، زخمی شده‌اند.
این مقام وزارت امور داخله تاجیکستان گفته است: «تعداد کمی از افغانستان از مرز عبور کرده و وارد خاک تاجیکستان شدند و به سوی یک گروه چینی که در پروژه معدن طلا کار می‌کردند، تیراندازی کردند.»
هنوز تروریستی بودن این حمله از سوی مقام‌های نظامی و دولتی تاجیکستان تایید نشده است.
با این وجود این حمله پس از نگرانی‌های مقامات تاجیکستانی نسبت به ناامنی‌ها در مرز این کشور با افغانستان انجام شده است.
این حمله در حالی انجام شده که سازمان پیمان امنیت جمعی طرح تقویت کمربند امنیتی در مرز تاجیکستان و افغانستان را تایید کرده است.
